رواية "في الخامسه وربع صباحآً"
مستنتش رد ماما عشان عارفه انها هتقولي هروح اجيها انا او نبعت سلمى فا سيبتهم وجريت
دخلت على اوضته كان مغمض عينو وفتحها لما سمع صوت الباب بص ليا وقال:
_رجعتي تاني ليه؟
فتحت التلاجه الصغننه اللي جنبه خرجت منها علبة عصير فتحتها وادتهالو وخدت تفاحه من طبق الفاكه قطعتها وحطيتها جنبه وحطيت إزازة مياه جنبه وقولت:
_هقول للممرضه تخلي بالها منك
قولتها ونا بطلع موبايلو من جيبي ادتهولو وقولت:
_خليه معاك ونا هكلمك طول اليل وبكرا هجيلك
كنت لسه همشي بس مسك إيدي وفضل ساكت شويه بعدين باسها وقال:
_انا عارف انا عندي اي وعارف اني مش هتحرك تاني ويمكن ده عقاب ربنا ليا على كسرة قلبك بس انا فعلآ حبيتك ومش بكل ما فيا يا روز تقدري تشوفي حياتك وكأني مظهرتش اصلآ
_هنكمل كل اللي انت كنت عايزني اساعدك فيه وهنكمل متشيلش هم حاجه وهتتحرك تاني انا واثقه
قولتها وسيبته وخرجت ونا معيطه نزلت ل ماما وسلمى ومشينا سوا من غير ولا كلمه وصلت البيت جريت على اوضتي
غيرت هدومي وفضلت اعيط عشان لو كنت سمعته للأخر الصبح مكنش كل ده حصل مسحت دموعي ورنيت عليه
فضلنا نتكلم طول اليل اتضح انه كان هيبدأ مشروع جديد خاص بيه وهو انه يفتح محل يعرض فيه لوحاته عشان هو خريج فنون جميله واتضح برضو انه متخانق مع عيلته عشان طار بينهم وبين عيله تانيه في الصعيد ويا يجيب حقهم يا يكون برا عيلتهم ويوسف عشان مالوش في حكايات الطار دي سابهم وخرج من عيلتهم بقا لوحده!
كان عايزني اكون اهله كان عايزني اكون سبب في نجاح مشروعه كان عايز يبدأ حياه جديده!
نمنا انا وهو ومقفلناش الكول صحيت ٩ الصبح ولقيت الكول لسه مستمر نمنا على صوت أنفاس بعض!
ابتسمت وسيبت الكول مفتوح وجريت على المطبخ سلقت فرخه وعملت شوربة خضار
وجريت على اوضتي فضلت واقفه قدام الدولاب ربع ساعه مش عارفه البس اي في الاخر لبست عبايه سوده على طرحه سوده وخدت الاكل في شنطه من شنط المطبخ وخدت موبايلي ولسه هخرج من باب البيت لقيت ماما وهي بتقول:
_على فين وش الصبح كدا وكمان من غير ما تقول؟
